帶埋主子一齊玩 ─ 將軍澳清水灣海陸空尋趣

掛住泰國陽光與海灘？不如遊遊將軍澳清水灣。Kilowatt小隊再次出動，為你整理本地自駕遊路線，唔怕悶親！踩單車、食海鮮、放風箏，可以話玩轉海陸空，行程仲係Pet-Friendly𠻹！

第1站：JOMO是靚早

一日之計在於晨，第一站我哋先去JOMO Kitchen & Health Hub食個「是靚早」。JOMO位於寧靜將軍澳海傍，景觀超級靚，加上無遮無擋，日照能夠射入店內，真係非常Chill。呢度有戶外露天座位，帶埋主子嚟就啱晒！店舖主打自家製蛋糕同純素甜品， 亦提供肉食同主食選擇，例如手工意粉同酸種麵包都係好評之作。

JOMO全寫係Joy of Missing Out，即係「錯失的快樂」，係因應「FOMO（Fear of Missing Out）」而衍生。FOMO原意係指因為怕錯過社交活動而引起焦慮。JOMO正正係相反，偶爾Anti-Social，不被FB、IG佔據生活，係另一種體驗。喺JOMO，你就可以好好享受一下Me Time！

除咗JOMO，其實呢頭仲有好多文青Cafe，例如Dreams Café、Urban Coffee Roaster，仲有一間以露營做主題嘅Peloton。

泊車方面，建議可以泊喺海天晉滙，有Tesla中速充電站同V3超充站。

第2站：將軍澳海濱公園

食飽飽，梗係要郁一郁。將軍澳海濱長廊長達1.6公里，連接將軍澳市中心、調景嶺同康城，四通八達。臨海景色優美舒適，吸引好多人帶埋主子喺度漫步。呢度仲有單車可以租，短租一個鐘都有交易。長廊單車徑同行人路分開，鮮有人車爭路情況，所以路況好安全，就算有小朋友都可以一齊踩單車出遊。

一場嚟到，梗係要睇一睇即將通車嘅將軍澳跨灣大橋，將軍澳跨灣大橋係全港首條大橋同時設有行車道、行人路、單車徑同觀景台，可供遊人喺大橋沿海長廊踩單車同散步，沿途飽覽無敵海景。

第3站：大坑墩（清水灣郊野公園）

離開海濱公園，拎返架車，下一站我哋出發去大坑墩！ 大坑墩位於清水灣郊野公園內，大家經常話去大坳門放風箏，但其實真正放風箏地點係大坑墩，只是因為大家通常喺大坳門下車，所以造成誤會。

呢度一大片草地，非常啱畀狗狗放電，清水灣郊野公園仲有燒烤場，實在係郊遊樂之選。大天空再加上大草地，夜晚嚟仲可以數星星！

 大坑墩遠眺可以睇到果洲群島、橫瀾島、布袋澳等等，風景真係好唔錯。 呢度因為地方開揚，而且風勢急勁，唔少風箏發燒友會喺呢度放風箏，有好多人都會一家大細到喺度享受吓家庭樂。就算兩手Fing Fing去唔使擔心，因為小食亭有賣風箏，獨市嚟講價錢都合理，仲有布同膠兩種選擇。

泊車泊邊好？大坑墩（清水灣郊野公園）停車場就有免費車位提供！

第4站：布袋澳

玩咗半日，又係時間醫醫肚，香港人咁鍾意食海鮮，今次海陸空尋趣又點可以唔食海鮮？由大坳門揸車到布袋澳村，只需幾分鐘車程。呢個海灣被兩邊岬角包圍，形成一個狹窄出口，同布袋相似因而得名。布袋澳村有兩家規模比較大嘅海鮮餐廳，其中「發記」由漁民世家經營，來訪嘅食客多數都會點墨魚刺身，清爽鮮味。仲有一味必須預訂嘅漁家版海膽飯，香氣四溢，都係唔少人嘅心頭好。

布袋澳村周圍冇大型停車場，所以我哋就泊喺路邊，亦可泊喺山腳附近，再行入村。

第5站：佛堂門天后古廟

下一站我哋就去附近嘅佛堂門。眾所周知，香港開埠初期係一個漁港，因此媽祖、洪聖等海神特別深受漁民敬奉。唔講你未必知，香港天后廟有超過300座，當中最古老、規模最大嘅一座，就係位於清水灣佛門堂天后古廟，所以呢座古廟又有「大廟」之稱。

呢座古廟建於南宋理宗時期（約1266年），廟內仲保留咗清朝嘉慶四年所鑄嘅鐵香爐及道光二十年鑄造嘅銅鐘等文物，被評為一級歷史建築。正廟供奉天后，偏殿有多張龍床，傳說係畀神仙休息。平日好多善信都會「摸龍床」沾一沾仙氣，祈求子嗣、健康及財帛。

呢座天后古廟可以話係本地居民歷史、文化同生活見證，即使有冇信仰，都值得去睇睇。單單望住平靜佛門堂，都係一件賞心樂事！有時間仲可以喺碼頭垂釣𠻹。

清水灣鄉村俱樂部門前有免費泊車位，大約行5分鐘就到古廟喇！

第6站：康城

最後一站，我哋去到The LOHAS康城，不過時間就差不多日落了。提提各位奴才，如果想帶埋主子入商場，記得要坐寵物車、入袋或者手抱呀！

唔少香港人因為無法外遊好耐「無返鄉下」，康城就有間佔地超過10,000呎嘅NAMCO分店，啱晒用嚟醫醫思鄉病！呢度有過100部夾公仔機，無論情侶定係一家大細夾公仔，都絕對唔會覺得擠迫。除咗主打公仔機外，仲有擲彩虹丶巨型氣墊球同籃球機等等，店內特設多款全新獨家機種，包大家呢個偽日本遊玩得盡興！

除咗NAMCO，康城仲有全港最大嘅溜冰場。LOHAS Rink溜冰場佔地近1.7萬呎，除咗環保，仲採用高質燈光同音響設備，鍾意溜冰一定唔可以錯過！如果對溜冰無興趣，亦都可以到訪一下馬會日出康城店。咪住先，當然唔係去買馬買六合彩啦！呢間分店馬會特別注入休閒娛樂元素，為大家帶來全新體驗。活動專區有逼真模擬賽馬遊戲，畀馬迷化身騎師試試策騎樂趣，仲有各種刺激運動遊戲可以玩。工作坊專區就會定期舉辦工作坊，畀顧客創造獨一無二嘅專屬手作品。

泊車可泊The LOHAS康城，有E-Charge易充站、Tesla中速充電站同V3超充站提供。