東鐵綫過海段通車—嚴選最方便港鐵泊車轉乘車站

講咗咁多年，港鐵東鐵線過海段終於通車喇。靜靜雞話畀大家聽，Kilowatt小隊入面都有「鐵膠」，當然超級興奮啦。所以今次亦都特別落力，幫大家整理咗最方便嘅港鐵泊車轉乘車站！

唚氣提提大家，港鐵有「泊車轉乘計劃」，駕駛人士使用同一張八達通出入停車場，再喺泊車期間乘搭港鐵，就可以享有泊車優惠！當然唔少得，Kilowatt仲會講講附近有咩充電站啦，如果黑仔撞正停車場滿晒，或者想去附近食個飯，都可以搵到位叉叉電先。事不宜遲，即刻睇睇資料～

2022 嚴選最方便港鐵泊車轉乘車站

1. 金鐘站

金鐘站成為四綫超級轉乘站，將有港島綫、荃灣綫、南港島綫及東鐵綫轉乘。金鐘夏愨道的威信停車場亦提供全新嘅泊車轉乘優惠，符合條件的話，可以享有半價時租優惠，每小時只需$18（早上7時至晚上11時) 。

金鐘站停車場泊車收費及泊車轉乘優惠

符合金鐘站泊車轉乘優惠的條件，需要上午5時至翌日凌晨1時間出入停車場，並於金鐘站乘搭港鐵到九龍或新界的地鐵站出閘，只要出入車及出入閘使用同一八達通即可。

金鐘站附近充電站

夏愨道的威信停車場本身設有13個快速及中速充電站。附近亦有中信大廈停車場的Tesla 充電站，以及金鐘太古廣場一期充電站。

2. 紅磡站

紅磡站停車場泊車收費及泊車轉乘優惠

過海段通車，又點可以唔提主角之一嘅紅磡站？47年歷史嘅舊月台完成使命，全民見證由東鐵總站變轉車站，就由紅磡站講起！

首選當然係泊紅磡站停車場（九龍紅磡暢運道8號），享有泊車轉乘優惠之下，收費$105一日、$185兩日，第3日開始$105一日。如果係城際直通車乘客，想使用泊車轉乘優惠，需要喺繳付泊車費前於停車場繳費處（近車輛出閘處）出示泊車期間嘅有效城際直通車車票。

紅磡站附近充電站

上述嘅紅磡站停車場，本身就設有E-Charge易充站，非常方便！其他選擇仲有家維邨充電站，Tesla用家就可以去逸酒店Tesla充電站或嘉里酒店Tesla充電站。

3.荃灣西站

荃灣西站除咗有DON DON DONKI，接駁屯馬線之後去邊都咁方便，當然仲可以去搭返荃灣線啦。

荃灣西站停車場泊車收費及泊車轉乘優惠

荃灣西站停車場（荃灣海興路）亦有泊車轉乘優惠，星期一至五 每小時收費$12；星期六、日及公眾假期每小時收費$15。

荃灣西站附近充電站

Plaza 88停車場坐擁新界西最大型Tesla叉電站，提供超過30個充電器，包括中速充電站同超充站，亦有畀其他電動車使用嘅AC充電站。除咗Plaza 88，其實仲有好多選擇，Kilowatt小隊就為你精選埋如心廣場一期同如心廣場二期嘅充電站！

4.西九龍站

西九龍站停車場泊車收費及泊車轉乘優惠

香港西九龍站座落於港鐵九龍站與柯士甸站之間，經天橋或行人隧道接駁，可以輕鬆利用屯馬線、東涌線或機鐵線輕鬆往返各區。

西九龍站轉乘港鐵，可用優惠價泊高速鐵路西九龍站停車場，收費每小時$17；而轉乘高鐵亦有優惠，每日收費$100。留意返，如果想享用高鐵泊車轉乘優惠，請喺繳付泊車費前，喺停車場繳費處（近車輛出閘處）出示泊車期間嘅有效高鐵車票以兌換優惠。

西九龍站附近充電站

想喺西九龍站附近電，可以考慮前往圓方，當中圓方（北停車場）有E-Charge易充站、Tesla中速叉電站、V2超充站同V3超充站，非常方便；而圓方（南停車場）亦有E-Charge易充站。

5.九龍站

九龍站位於黃金地段，有幾四通八達都唔使特別多講。除咗接駁東涌線，亦係機場快線唯一一個處於九龍區嘅站。

九龍站停車場泊車收費及泊車轉乘優惠

喺九龍站泊車，可以泊九龍站停車場（油麻地雅翔道）。港鐵泊車轉乘優惠，收費每小時$16，機場快線泊車轉乘優惠，收費每小時$10。機場快線泊車外遊亦可享優惠，須停泊最少兩日、最多14日，每日收費$100。

九龍站附近充電站

九龍站附近除咗有圓方，亦可以去ICC環球貿易廣場充電站，仲有K11 Muesa嘅E-Charge易充站同Tesla中速充電站。

6.奧運站

奧運站係東涌線中途站，可以乘搭往東涌方向或香港方向列車，往返大嶼山、青衣、九龍西同港島北岸等地都相當快捷。

奧運站停車場泊車收費及泊車轉乘優惠

奧運站附近充電站

喺奧運站附近泊車，當然要數奧海城啦。奧海城一期商場停車場（西九龍海輝道11號），使用泊車轉乘優惠後，收費只需每小時$13，係咪好抵呢？

奧運站附近有好幾個充電站，例如上述嘅奧海城一期商場停車場，就已經有Tesla中速充電站同Tesla超充站，超級方便！另外分別仲有奧海城二期中電CLP充電站同奧海城三期充電站。